ភ្នំពេញ៖ ក្រសួងប្រៃសណីយ៍ និងទូរគមនាគមន៍បានអំពាវនាវអ្នកប្រើប្រាស់បណ្តោញតេឡេក្រាម កុំចុច និងបំពេញព័ត៌មាន លើរូបភាពមានចលនា (Gif) ដែលមានពាក្យថា “Gift 74/100 Free Premium” ពីព្រោះនេះជាល្បិចបោកបញ្ឆោតថ្មីដែល Hacker ធ្វើឡើងដើម្បីលួចយកគណនីតេលេក្រាម។

ដើម្បីជៀសវាងបាត់បង់គណនីតេឡេក្រាម ក្រសួងប្រៃសណីយ៍បានប្រាប់អ្នកប្រើប្រាស់នៅពេលដែលទទួលបានសារពីនរណាម្នាក់ដោយភ្ជាប់ជាមួយនឹងពាក្យថា “Gift 74/100 Free Premium” ដែលតម្រូវឱ្យបំពេញព័ត៌មានដូចជា ឈ្មោះ និងពាក្យសម្ងាត់គណនី សូមកុំចុចបើកមើល ឬបំពេញព័ត៌មានតាមឱ្យសោះ។

ក្រសួងបានណែនាំអ្នកប្រើប្រាស់ទាំងឡាយប្រសិនជាអ្នកប្រើប្រាស់បានចុច សូមកុំបំពេញព័ត៌មានអ្វីទាំងអស់ សូមប្តូរលេខសម្ងាត់ និងចាកចេញ (Sign Out) គ្រប់ឧបករណ៍ទាំងអស់ភ្លាម ជៀសវាងការបាត់បង់គណនី។

ក្រសួងបានណែនាំឱ្យអ្នកប្រើប្រាស់អាចឈ្វេងយល់បន្ថែមក្នុងគេហទំព័ររបស់ “ការិយាល័យឆ្លើយតបបញ្ហាបន្ទាន់នៃកុំព្យូទ័រ (CamCERT)” នាយកដ្ឋានសន្តិសុខបច្ចេកវិទ្យាគមនាគមន៍និងព័ត៌មាន នៃក្រសួងប្រៃសណីយ៍និងទូរគមនាគមន៍ ដែលមានអាសយដ្ឋាន www.camcert.gov.kh ឬរាយការណ៍ ឬសុំជំនួយបច្ចេកទេសបន្ថែមលើករណីនេះ តាមរយៈអ៊ីម៉ែល incident@camcert.gov.kh ឬទូរសព្ទលេខ ០២៣ ៧២២ ៣៩១ / ០១៦ ៨៥១ ៦៧៨៕